छ्यी़रीक
भीजा भुमु स्यीछानी खोनी खोवाला केबी भीजा भुमुनी याङ भीजा भुमु म्हङ्बु फेइ फेइ झ्येनी ग्याँगम खाङादे। खोनी म्हीवइ कुन्च्योकला देम्बा झ्यीम्हीतादे। म्हीवाइ कुन्च्योकला लोला म्हेन्डोङ्गे ल्हेगा झ्येनी दीक्पा म्हाङ्बु झ्यीय्हो़ता दे। खोनी कुन्च्योक धु ङ्हेबु म्हाङादे। खोइकानी खोरु नोहा शीके म्हीज्यी य्होतादे। नोहाइ कुन्च्योककी खाला च्यी य्हो़तादे। नोहला ङ्हेज्यु म्हीतादे। खोनी कुन्च्योककी ङ्हीङ्ज्यीक नोहला शुङादे, “था ङा ग्याँगामला छ्प्पा झ्येन्दी तोङ्गेँ” शुङानाङादे। खोनी छ्याप्पा खोइ शो़नी ग्याँगामला य्हो़ता म्ही दोक म्हीता शोङे शुङानाङादे। खान्डालाशीना खोवाइ झ्यीबी लेगा दुक्पावोइ ग्याँगम खाङ्नी दुक। हीनायाङ खोइकीनी कुन्च्योककी नोहाला था खेराङ ढु झ्येन्दी शो़ सुङादे। कुन्च्योककी नोहला ढुवोइ झ्येज्युङ दाङ ढुवोइ शोप्ता न्हेन्डे न्हेन्डे झ्येनी शो़ सुङा नाङादे। ढुवोइ बुला ख्युरी न्हाङ्मी दाङ छ्यो़शोङ, खोनी रीकी सेम्ज्येन, झ्या झ्यीबु नी छ्या रे रे फो दाङ म्हो झ्येनी ढुइ बुला लुक सुङा नाङादे। खोनी कुन्च्योककी शुङा डासेराङ झ्येनी नोहइ ढु स्योबादे। खोनी नोहाइ ढु शो़ छानी खोनी कुन्च्योककी शुङा डासेराङ झ्येनी खोरी न्हाङ्मी दाङ छ्यो़शोङ, ह्रीकी सेम्ज्येन, झ्या झ्यीबु नी छ्या रे रे फो दाङ म्हो झ्येनी ढुइ बुला श्युबा दे। खोनी खोरु नोहाइ छ्यो़सोङ, खोवाइ लाएला शाज्येन खोवा थाप्स्येक झ्येनी श्याक्नी य्होतादे। खोनी कुन्च्योककी ढुइ गोचा ग्याबा न्हाङादे। खोनी खोरु ङ्हीमा शीप्च्यु साक छ्येँघाङ ङ्हीङ्घाङ छ्याप्पा झ्येन्दी तोङा नाङादे। खोनी सा खेनी छ्यु झ्येन्दी थ्यो़न्दादे। खोनी ह्री झ्येन्दीवा न्हीबादे। खोनी ढुवोइ झ्यीला य्हो़ता ह्रीकी सेम्जे, म्ही, झ्या झ्यीबु छो़सोङ दोक शीयादे। ल्हो च्हीकचोला छ्यु काम्बादे खोनी नोहाइ न्हाङ्मी ढुइ बुला य्होताछ्यो़शोङ, झ्या झ्यीबु ह्रीकी सेम्जेँ दोक थ्यो़न्दादे। खोनी नोहाइ कुन्च्योकला त्यो़रा श्युबादे। खोनी कुन्चयोककी नोहला न्हेन्डे शुङ्नी झ्यीलाब नाङादे, “था खीराङ ग्याँगामला फेइ फेइ ग्युक” सुङादे। खोनी कुन्च्योककी, “था ङ्हे न्हम्ला ग्याँगामला न्हेन्डे छ्याप्पा झ्येन्दी ताङ्नी ग्याँगम म्हीता ताङ्मो” शुङ्नी कुन्च्योककी नोहाला थाम्ज्यीक शो़क्पा नाङादे। ङ्हे मुबी कीला ज्या श्याक्नी यो़क सुङा नाङादे। ज्या नो खीराङ दाङ ङ्हे घुङ्गी थाम्जीककी तावो हीँ शुङा नाङादे।
