धुइ ग्याँगाम
कुन्च्योककी सा दाङ नाम ताङ ह्लाइ य्हु शोवा नाङादे। कुन्च्योककी ताङ ह्लाइ य्हुला भाङ्जेन शोवा नाङादे। भाङ्जेनवोइ ल्हेगावो कुन्च्योककी सान्ग्यु हाछु क्योजेँ, कुन्चोकला तो़रा स्युजेँ, कुन्च्योककी सुङाला घाला ङ्हेन्जेदे। भाङ्जेन रेङ्गाइ कुन्च्योककी सुङाला घाला म्हाङ्हेन्दाला दीक्पा सावादे। खोनी खोवा डे झ्युङादे। खोवाला डे शीकेन्दे। डेवाइ कीला छ्येस्यो च्यीक य्हो़तादे खोला दी़ शीकेन्दे। खोवा कुन्च्योककी डा दे। कुन्च्योककी म्ही लाएला न्हाम्ना न्हाम गान्दी जेता नाङ्गेन्दे। हीनायाङ डे न्होइ खो म्हीता तोङ्जेनकी ल्हेगा झ्यीकेन्दे। कुन्च्योककी ङ्हीमा च्यीक खोवाला ठीम तोङा नाङ्गेन्दे। ठीमगो घ न्डे दे शीना छे घाङ साक न्हाम्ला म्हीशीङे म्हेइ बुला लुक्पा नाङ्गेन्दे। खोनी म्हेवो कीनी खोवा थो़आ म्हीछुङ्गेन्दे।
